Liebi Janine
Am 13. Juli 2011 würdsch du 22 Jahr alt. Ja, es isch wahr: im mim Herz wirsches du au. Nid de Konjunktiv söll siege sondern de Wunsch wo wahr isch und wird. Klar, du bisch ja nümme uf dere Wält und doch... Grad no händ dini Mama und ich hüt Abig am PC Bilder vo de Dixie, eusem Hund, und dir agluegt. Als wärs no geschter gsii. D'Dixie isch aber scho es paar Jahr tod und du bis vor über 2 Jahre gange... Janine auch hüt fälsch du mir no so fescht. Ich ha doch immer a dim Geburi frei gnoh. z'Mindscht fascht immer. Sicher immer, wänd's gange isch ide Bude. D Mama hät mänge Chindergeburi gmacht. Am Abig vorher, also so wie hüt eine wär, hät sie dir amigs d'Girlande im Esszimmer ufgspannt. Das isch jetz leider nüm so. Liebi Janine du häsch mir so viel gäh für mis Läbe. Dafür bin i dir dankbar. In zwüsched hani au mit em VAter im HImmel Fride gschlosse und ich finde, d'Heilig am mim Härz isch am passiere und nimmt zue. Ade Pfingschte i de Stadtchile - wo du mal es Konzert gäh häsch - händ Schwarzi es Gospelkonzert gäh und det hät mir öpper gseit, dass er mis Interview uf Lifechannel ghört hebi. Churz drüber abe hani es wunderschöns und berüherends Mail übercho vonere Muetter, wo churz nach de Geburt ihres Chind verlore hät und dänn bald drüberabe no es Chind vonere Fründin. Ihres Mail hät mi so tüüf troffe und es hät so guet tue. Z'gseh, wie anderi Mänsche nach so Schwärem de Wäg finded oder en Wäg, en Prozess gönd, wo's au wieder es Stückli Hoffnig git und Liecht chunt.
Janine, mir glaubed fescht und wüssed tüf i eusne Härze, dass du jetzt bi JEsus bisch, eusem Heiland und det kei Sorge, kei Träne, nüt meh muesch erträge, wo z'schwär wär zum Läbe! Danke VAter im HImmel, dass du so guet zu eusere Janine luegsch! Merci
Janine, morn chömed nomal vili Fründe und Fründinne vo dir zu eus, um echli vo dir z'prichte und z'verzelle. Du gsesch, mir fiired din Geburi, als wänn du no da wärsch. Nei, natürli nid. Du fälsch eus. Was wär ein Geburi ohni Geburichind? Es Fäscht ohne de Jubilar? Aber für mich bisch du halt glich echli da und echli bi eus...
De Abi hät sich fürs Wuchenänd agmäldet. Chunt er ächt? Ich chas no nid so glaube. Was dänkt er ächt und wie gats ihm? Hät er sini Herzenstüür für de Heiland scho chli ufgmacht, so wies im de Marcus erchlärt hät det in England? Was wär ächt, wenn du noch läbe würsch und mit ihm zäme wärsch? Wie wärs wohl wiitergange? Würsch du jetzt in C. studiere? Oder wärsch es Mami und total überfordert? Hätsch endli Autoprüefig und das ersch no uf englisch gmacht? Wie au immer, es wäre Stoff für es Buech... Wer weiss.
Ich wünsch dir uf jede Fall alls Gueti und en super Tag (oder Ziit - nei das gits ja im HImmel au nid). Ich wär au scho gärn det bi dir bzw. bi mim HEiland. Aber da une gits no es paar Jöb und ich wot nid chläme und mi trucke. Scho wäge dir nid! Du hetsch di au nid truckt...
Also machs guet und bis es anders Mal
Din Papa - wo di nie vergisst